राष्ट्रपतीय अभियानबारे ७० प्रतिशत अमेरिकी चिन्तित र निरास

धेरैजसो अमेरिकीले चुनाव हुने दिन आइपुग्दा उत्साह होइन चिन्तित देखिएका छन्। करिब १० मध्ये सात अमेरिकीले सन् २०२४ को राष्ट्रपतीय अभियानबारे चिन्तित वा निरास महसुस गरिरहेको बताएका छन्।

एपी–एनओआरसी सेन्टर फर पब्लिक अफेयर्स रिसर्चको सर्वेक्षणले यस्तो खुलासा गरेको हो। केवल एक तिहाइले मात्र उत्साहित महसुस गरेको बताएका छन्।

अभियानको अन्तिम हप्तामा २०२४ को राष्ट्रपतीय प्रतिस्पर्धामाथि व्यापक अनिश्चितताको भावना छाएको छ। हालैका सर्वेक्षणअनुसार राष्ट्रियस्तरमा र प्रमुख स्विङ राज्यहरूमा प्रतिस्पर्धा कडा छ। त्यहाँ न त डेमोक्रेट कमला ह्यारिस न त रिपब्लिकन डोनल्ड ट्रम्पले कुनै मापनयोग्य फाइदा देखाएका छन्। 

साथै उम्मेदवारहरूले एक अर्काको विपरीत समापन तर्कहरू प्रस्तुत गरेका छन्। ह्यारिसले ट्रम्प बदलाको भावना र आफ्नै व्यक्तिगत आवश्यकतामा मग्न रहेको आरोप लगाएकी छन् भने ट्रम्पले आइतबार राति एक र्‍यालीमा ह्यारिसलाई ‘आफ्नो बाटोमा सबै कुरा नष्ट गरेकी रेल दुर्घटना’ भनेर सम्बोधन गरे।
केही व्यक्ति चार वर्षअघिको चुनावभन्दा अझै बढी चिन्तित छन्। 

सन् २०२० मा एपी–एनओआरसी सर्वेक्षणले करिब दुई तिहाइ अमेरिकी चुनावबारे चिन्तित रहेको पाएको थियो। यो नयाँ नतिजाबाट तथ्याङ्कीय रूपमा महत्त्वपूर्ण भिन्नता छैन तर पार्टी समर्थकहरूका लागि चिन्ता केही बढी छ। लगभग १० मध्ये आठ डेमोक्रेटले अहिले चिन्तित महसुस गरिरहेको बताएका छन्। यो अघिल्लो चुनावमा लगभग तीन चौथाइबाट केही बढेको हो। लगभग दुई तिहाइ रिपब्लिकन चिन्तित छन्।

त्यसविपरीत स्वतन्त्रहरूमा अर्थपूर्ण परिवर्तन भएको छैन। उनीहरूले डेमोक्रेट वा रिपब्लिकनहरूको तुलनामा कम चिन्तित देखिएका छन्। लगभग आधाले चिन्तित रहेको बताएका छन्। यो सन् २०२० को नतिजासँग मिल्दोजुल्दो छ। विगतका चुनाव चक्रहरूको तुलनामा अन्य भावना बढी तीव्र भएका छन्।

लगभग एक तिहाइ अमेरिकीले सन् २०२४ को अभियानबारे उत्साहित महसुस गरिरहेको बताएका छन्। यो सन् २०१६ को चुनावको लगभग एक–चौथाइबाट बढेको हो तर बहुमत अमेरिकीले यो वर्षको चुनावबारे उत्साहित नभएको बताएका छन्।

यद्यपि निर्वाचनप्रति अमेरिकीको निराशाको स्तर लगभग स्थिर रहेको छ। करिब ७० प्रतिशत अमेरिकीले निरास शब्दले उनीहरूको भावनात्मक अवस्था वर्णन गर्ने बताएका छन्।