हामीले हिजबुल्लाहको ‘हेटक्वाटर’मै हमला गर्‍यौँ : इजरायल

इजरायली सेनाले लेबनानको राजधानी बेरुतमा रहेको हिजबुल्लाहको मुख्यालय (हेटक्वाटर) मा आक्रमण गरेको दाबी गरेको छ।

आक्रमणपछि इजरायली मिडियामा यो हमलाको निशाना हिजबुल्लाह नेता हसन नसरल्लाह भएको दाबी गरिएको छ।तर हिजबुल्लाह स्रोतले एएफपी, रोयटर्स तथा लेबनान र इरानका स्थानीय मिडियालगायत विभिन्न समाचार एजेन्सीलाई नसरल्लाह जीवित र सुरक्षित रहेको दाबी गरेका छन्।

तर, अहिलेसम्म न इजरायलले यो हमलाको निशाना नसरल्लाह भएको बताएको छ न त हिजबुल्लाहले नसरल्लाहबारे कुनै आधिकारिक जानकारी दिएको छ।

आईडीएफले हिज्बुल्लाहको मुख्यालय सहरको दक्षिणमा रहेको दहियाहमा "आवासीय भवनहरू मुनि" रहेको बताएको छ।

इजरायली सेनाले मुख्यालयमा ‘सटिक आक्रमण’ गरेको बताएको छ।‘मुख्यालय जानाजानी आवासीय भवनहरूमुनि बनाइएको थियो’, आईडीएफ प्रवक्ता एडमिरल डेनियल हगारीले भने, ‘यो लेबनानका जनतालाई 'मानव ढाल'का रूपमा प्रयोग गर्ने हिज्बुल्लाहको रणनीतिको एक हिस्सा हो।’

इजरायली सेनाको आक्रमणपछि बेरुतमा धुवाँको मुस्लो देखिएको छ।