टर्बुलेन्स हुँदा १ जना सिलिङमा अड्किए , ३० घाइते , विमानस्थलको आपतकालीन अवतरण

पछिल्लो समय एअर टुर्बुलेन्सका घटना बढिरहेका छन्। सोमबार मात्रै स्पेनको मेड्रिडबाट दक्षिण अमेरिकी देश उरुग्वेको राजधानी मोन्टेभिडियो गइरहेको एअर युरोपाको बोइङ ७८७९ ड्रिमलाइनर जहाज अत्यधिक टर्बुलेन्स हुँदा ब्राजिलको विमानस्थलमा आपतकालीन अवतरण गर्नुपरेको थियो।

जहाजमा ३२५ जना यात्रु थिए। आन्ध्र महासागरको आकाशमा यात्रा गरिरहेको बेला उक्त घटना भएको हो। टर्बुलेन्समा ३० जना घाइते भएका द गार्डिएनले जनाएको छ। एक जना जहाजको सिलिङमै अड्किएको भिडियो बाहिरिएको छ। जहाजले धेरै उफार्दा उनी ओभरहेड लगेज कम्पार्टमेन्टभित्र छिर्न पुगेका थिए। उनलाई विमानमा चढेका यात्रुहरूले त्यहाँबाट तल झारेका भिडियोमा देख्न सकिन्छ।

घटनापछि चालक दलले विमानलाई ब्राजिलको नातालमा डाइभर्ट गरेका थिए। त्यहाँको अलुइजियो अल्भेस अन्तर्राष्ट्रिय विमानस्थलमा आपतकालीन अवतरण गरियो। त्यहाँ स्वास्थ्यकर्मीहरू उपस्थित भइसकेका थिए। घाइतेहरूलाई त्यहीँ उपचार गरिएको समाचारमा उल्लेख छ।

टर्बुलेन्सपछि बाहिरिएका तस्वीर तथा भिडियोमा जहाजमा क्षति पुगेको देखिन्छ। लगेज कम्पार्टमेन्ट भाँचिएको छ भने बस्ने सिटहरूमा पनि क्षति पुगेको छ। घाइते यात्रुमध्ये धेरैलाई पेटमा र अनुहारमा चोट लागेको छ।

एयर युरोपाले घटनाको पुष्टि गर्दै घाइते यात्रुको उपचार भइरहेको जनाएको छ। विमानमा भएको क्षतिको विवरण अझै आउन बाँकी छ।