पोखरामा ठाउठाउमा पहिरो चार जनाको मृत्यु: नौ घाइते

पाेखरा-पहिरोमा परी पोखरामा चार जनाको मृत्यु भएको छ ।

जिल्ला प्रहरी कार्यालय पाेखराका अनुसार पहिरोमा परेर घाइते हुनेकाे संख्या नौ रहेकाे छ ।

अविरल वर्षाका कारण गएको पहिरोमा पोखरा महानगरपालिका–१८ सराङकोट गोठादीस्थित टङ्कबहादुर थापाको घरमाथिबाट राति अन्दाजी २:४५ बजेको समयमा खसेको पहिरोमा पुरिँदा तीन जनाको मृत्यु भएको हाे ।

सो घटनामा परी घाइते भएका अन्य छ जनालाई उद्धार गरी मणिपाल शिक्षण अस्पताल र पश्चिमाञ्चल अस्पतालमा लगिएको ले जानकारी दिए ।

जिल्ला प्रहरी कार्यालय पाेखराका प्रहरी नायब उपरीक्षक सुवास हमालका अनुसार थापाको घरमा बिहीबार परिवारमा जन्मदिन मनाउने कार्यक्रम रहेकाले घरमा कति जना थिए र को थिए भन्ने खुल्न सकेकाे छैन् । प्रहरी र स्थानीयवासीले घाइतेको उद्धार गरेकाे प्रहरीले जनाएकाे छ ।

त्यसैगरी पोखरा महानगरपालिका–२५ हेमजामा रामचन्द्र अधिकारीको घर पहिरोमा पुरिँदा अधिकारीकी आमा ७० वर्षीया भीमकली अधिकारीको घटनास्थलमै मृत्यु भएको प्रहरीले जनाएको छ।

घटनामा अन्य मानवीय क्षति नभएपनि तीन वटा बाख्रा पुरिएका छन्।

पोखरा–१८ छोरेपाटन सिमलटुँडामा चन्द्रबहादुर मगरको घर माथिबाट खसेको पहिरोमा परी मगरसहित उनकी श्रीमती शान्ति र छोरा सुशान मगर सामान्य घाइते भएका छन्।

उनीहरुको नमस्ते अस्पतालमा उपचार भइरहेको प्रनाउ हमालले जानकारी दिए।

अविरल वर्षासँगै पोखराको रामघाटस्थित सेती नदी थुनिँदा सुकुम्वासी बस्ती डुबानमा परेको र स्थानीयवासीलाई रातिनै माइकिङ गरी अन्यत्र सुरक्षित स्थलमा लगिएको जनाइएको छ।