अवैध लागूऔषध सहित पक्राउ

मकवानपुर-
हेटौंडा उपमहानगरपालिका ११ थाना भर्‍याङबाट अवैध लागूऔषध अफिम १ केजी ९ सय ५९ ग्राम सहित राक्सिराङ गाउँपालिका ३ बस्ने ३५ वर्षीय पदम बहादुर थिङलाई प्रहरीले पक्राउ गरेको छ ।
विशेष सूचनाको आधारमा लागूऔषध नियन्त्रण व्यूरो कोटेश्वरबाट खटिएको प्रहरीले उनलाई लागूऔषध कारोवारको योजना बनाई रहेको अवस्थामा उक्त परिमाणको लागूऔषध अफिम सहित फेला पारी पक्राउ गरेको हो ।

पदमलाई आवश्यक कारवाहीको लागि जिल्ला प्रहरी कार्यालय मकवानपुरमा बुझाइएको उक्त व्यूरोले जनाएको छ ।

रुपन्देही-
बुटवल उपमहानगरपालिका १२ हरिया टोलबाट अवैध लागूऔषध चरेश २२ दशमलव ५ केजी सहित २ जनालाई सोमबार बिहान प्रहरीले पक्राउ गरेको छ । पक्राउ पर्नेहरुमा बुटवल उपमहानगरपालिका १२ हरियाली टोल बस्ने रुकुम पूर्व सिस्ने गाउँपालिका ८ घर भएका ३४ वर्षीय रतिभान दमाई र गुल्मी मदाने गाउँपालिका ७ घर भएका २९ वर्षीय मेघराज गिरी रहेका छन् ।

ईलाका प्रहरी कार्यालय बुटवलबाट खटिएको प्रहरीले उनीहरुलाई उक्त पारिमाणको लागूऔषध सहित फेला पारी पक्राउ गरेको हो ।
यस सम्बन्धमा स्थानीय प्रहरीले आवश्यक अनुसन्धान गरिरहेको छ ।