बाढी तथा पहिरोका कारण विभिन्न धनमाल क्षति

कैलाली -
बर्दगोरिया गाउँपालिका ६ बास्कोटी खोलामा गएराति आएको बाढीका कारण खोला किनारमा बस्ने लक्ष्मी ढोली समेत ८ जनाको घरबाट भाँडावर्तन, अन्नपात लगायतका सरसामान बगाउँदा क्षति भएको छ ।

उक्त स्थानमा बाढी आएको भन्ने खबर प्राप्त हुनासाथ ईलाका प्रहरी कार्यालय सडकपुर बौनियाबाट खटिएको प्रहरीले आवश्यक उद्दार कार्य गरिरहेको छ ।
सिन्धुपाल्चोक, जुगल गाउँपालिका ४ कात्तिके बस्ने ललित बहादुर श्रेष्ठको कच्ची घर शुक्रबार बिहान आएको पहिरोले बगाउँदा घर तथा घरभित्र रहेका विभिन्न सरसामानहरु समेत गरी करिब ७ लाख रुपैयाँ बराबरको धनमाल क्षति भएको छ ।

गुल्मी-
ईस्मा गाउँपालिका ४ ढाडमा शुक्रबार बिहान आएको पहिरोका कारण कालिका निमाविको ९ वटा कोठा रुपमा भत्किएर क्षति भएको छ । साथै सोही ठाउँ बस्ने बसन्ती घर्तीको घर र गोठ समेत पहिरोले पुरिएर क्षति भएको छ भने धन बहादुर घर्तीको बाख्राको खोर ६ वटा बाख्रा सहित बगाएको छ ।
सबै स्थानहरुमा तत्काल खटिएको प्रहरीले आवश्यक उद्दार कार्य गरिरहेको छ ।