परराष्ट्रमन्त्री खनालको चीन भ्रमण : ‘सन्तुलित कूटनीति’ मुख्य एजेण्डा

 राष्ट्रिय स्वतन्त्र पार्टी नेपालका सभापति रवि लामिछाने तथा परराष्ट्रमन्त्री शिशिर खनालले भारत भ्रमण गरेर दुई देश बिचको सम्बन्धलाई प्राथमिकतामा राख्दै सहकार्य गर्ने सहमति गरेसँगै सरकारको ध्यान चीनतिर गएको छ ।

परराष्ट्रमन्त्री खनाल चीन जाने तयारीमा जुटिसकेका छन् । परराष्ट्र मन्त्रालय स्रोतका अनुसार उनी जेठ ३१ गते चीन भ्रमणमा जान लागेका हुन् । परराष्ट्र मन्त्रालयका एक अधिकारीका अनुसार परराष्ट्रमन्त्रीको चीन भ्रमणको खासै एजेण्डा नरहे पनि एउटा ‘कट सी’ तथा ‘सन्तुलित कूटनीति’ का लागि भ्रमण हुन लागेको हो । त्यही अनुसार तयारी चलिरहेको उनले बताए ।

जेनजी आन्दोलनपछि अमेरिका तथा टिओबी गतिविधिका कारण असन्तुष्ट रहेको चीनलाई सन्तुलनमा ल्याउनका लागि परराष्ट्रमन्त्री खनाल चीन भ्रमणमा जान लागेका हुन् । नेपालका लागि भारत र चीन दुवै महत्त्वपूर्ण छिमेकी राष्ट्र हुन्, दुवै देशलाई सन्तुलनमा राखेर नै काम गर्नुपर्छ भन्ने वर्तमान सरकारको उद्देश्य रहेको मन्त्रालय स्रोतको भनाइ छ ।

भारत भ्रमणलगत्तै हुन लागेको चीन भ्रमणले नेपाल आफ्नो स्वतन्त्र र असंलग्न परराष्ट्र नीतिमा कटिबद्ध रहेको र दुवै छिमेकीसँग समान तथा सन्तुलित सम्बन्ध राख्न चाहन्छ भन्ने कुरालाई स्पष्ट पारेको अन्तर्राष्ट्रिय मामिलाका जानकार बिनोज बस्न्यातले बताए ।

बीआरआई अन्तर्गतका आयोजनाहरूको कार्यान्वयन र अगाडि बढाउने मोडालिटीबारे छलफल हुने एजेण्डा राखिए पनि मुख्य चासो सन्तुलित कूटनीति नै रहेको मन्त्रालय सम्बद्ध स्रोतले जनायो ।

चिनियाँ विदेशमन्त्री वाङ यीले सुरुमै परराष्ट्रमन्त्री खनाललाई चीन भ्रमणको निम्तो दिएका थिए । परराष्ट्रमन्त्री खनालले चिनियाँ समकक्षीको निम्तो स्वीकार गरी चाँडै आउने बताएका थिए । यद्यपि भ्रमणको समय तय भएको थिएन ।

परराष्ट्र मन्त्रालयको स्रोतले भन्यो, ‘अहिलेको मिति मोटामोटी जेठ ३१ नै हो, त्यही अनुसार तयारी चलिरहेको छ । आधिकारिक मिति घोषणा नभएसम्म मिति तलमाथि हुनसक्छ ।’

नेपाल–चीन जोड्ने केरुङ–काठमाडौँ अन्तरदेशीय रेलमार्गको बारेमा धेरै पहिलादेखि चर्चा हुँदै आएको हो । चीनले यसको बारेमा पटक–पटक अध्ययन गरेको थियो । त्यसको प्रगति कहाँ पुग्यो भन्नेबारे पनि परराष्ट्रमन्त्रीको चीन भ्रमणका क्रममा छलफल हुने बताइएको छ ।