महावीर भन्छन्ः बधाई खाइरहेको छु, मन्त्री भएको जानकारी छैन

काठमाण्डु– प्रधानमन्त्री बालेन्द्र (शाह) बालेन ले स्वतन्त्र सांसद् महावीर पुनलाई विज्ञान, प्रविधि तथा नवप्रवर्तमन्त्री नियुक्त गरेका छन् ।
तीन बजे शीतल निवासमा पुन र गृहमन्त्री सुधन गुरुङको सपथ ग्रहण समारोहको आयोजना भइसक्यो । तर, पुन भने आफूलाई मन्त्री नियुक्ति गरिएको बारे प्रधानमन्त्री कार्यालयबाट कुनै जानकारी नआएको बताउँछन् ।

पुनले टेलिफोन र भेटेर धेरैले बधाई दिए पनि आफूलाई भने खबर नआएको बताए ।

सम्पर्कमा आएका पुनले आफू प्रतिनिधिसभा बैठक कक्षमा रहेको बताए । उनका अनुसार सांसदहरुले पनि मन्त्री नियुक्त भएको भन्दै बधाई दिइरहेका छन् ।

‘बधाई आएको आएकै छ । तर, मलाई मन्त्री नियुक्ति भएकोबारे कुनै जानकारी आएको छैन’, पुनले भने ।

पुनले आफूले प्रधानमन्त्री र उनको टिमका सदस्यहरुलाई समाचारबारे नसोधेको पनि स्पष्ट गरे ।

खबर आएको खण्डमा भने मन्त्री पदको सपथ लिन जाने पुन बताउँछन् । ‘खबरै छैन । सदनमा छु, बैठकको घण्टी बज्यो । खबर आयो भने सपथ खान जानुपर्ला । तर, समाचारमा सुनेकै आधारमा म मन्त्री भएको हुँ भनेर सोध्ने कुरा पनि भएन’, उनले आफ्नै शैलीमा भने, ‘अहिलेसम्म मैले मन्त्री मागेको पनि छैन । कसैले दिन्छु भनेको पनि छैन ।’