होर्मुजबाट जहाज निकाल्न युरोपेली देशहरूले हामीसँग संवाद थाले : इरान

काठमाडौं । होर्मुज जलमार्ग अवरुद्ध हुँदा रोकिएका आफ्ना जहाजहरू निकाल्न युरोपेली देशहरूले आफूहरूसँग कुरा गरिररहेको इरानले जनाएको छ ।

इरानी सरकारी टेलिभिजनले युरोपेली देशहरू होर्मुज जलमार्ग क्षेत्रबाट आफ्ना अलपत्र फसेको जहाजहरूलाई जान दिने अनुमति प्राप्त गर्ने सम्बन्धमा इरानसँग कुराकानी गरिरहेका दाबी गरेका छन् ।

बीबीसी फारसीका अनुसार इरान टेलिभिजन न्युज नेटवर्क र इरानी ब्रोडकास्टिङ कर्पोरेसनले यो समाचार प्रसारण गरेका हुन् । यसमा युरोपेली देशहरूको नाम उल्लेख नगरी भनिएको छ, “पूर्वी एसियाली देशहरू, विशेष गरी चीन, जापान र पाकिस्तानका जहाजहरू यहाँबाट पार भएपछि, युरोपेली देशहरूले पनि आफ्ना जहाजहरूका लागि होर्मुज जलमार्ग क्षेत्रबाट गुज्रने अनुमति पाउनका लागि रिभोल्युसनरी गार्डको नौसेनासँग कुराकानी सुरु गरेको हामीलाई जानकारी प्राप्त भएको छ ।”

इरानले यसै वर्ष फेब्रुअरी २८ मा अमेरिका र इजरायलसँग युद्ध सुरु भएदेखि नै होर्मुज जलमार्ग लगभग बन्द गरिदिएको छ । जलमार्गमा इरानको नियन्त्रणका कारण विश्वभरको तेल र ग्यास बजारमा गम्भीर असर परेको छ ।

सामान्य दिनहरूमा विश्वव्यापी तेल र एलएनजी निर्यातको लगभग २० प्रतिशत हिस्सा यसै समुद्री मार्ग भएर जाने गर्दथ्यो । यसका साथै अन्य धेरै आवश्यक वस्तुहरू पनि होर्मुज जलमार्ग भएर ओसारपसार हुने गर्दछन् ।