बलिउडका सङ्गीत निर्देशक विपिन रेशमियाको निधन

 बलिउडका चर्चित सङ्गीत निर्देशक विपिन रेशमियाको निधन भएको छ । ८७  वर्षको उमेरमा विपिनको मृत्यु भएको हो । गएको केही समयदेखि उनलाई मुम्बईस्थित कोकिलाबेन धीरुभाई अम्बानी अस्पतालमा भर्ना गरिएको थियो ।

यसैबिच सेप्टेम्बर १८ को साँझ ६ः३० बजे उनको मृत्यु भएको बताइएको छ । विपिन सङ्गीतकार हिमेश रेशमियाका पिता थिए । उनी बुढ्यौलीसँग सम्बन्धित समस्या र रोगसँग जुझिरहेका थिए ।

उनी अस्पतालमा कहिलेदेखि भर्ना भएर बसेका थिए भन्ने जानकारी आएको छैन । विपिनको अन्त्येष्टि सेप्टेम्बर १९ मा जुहूमा गरिने बताइएको छ । बिहीबार नै उनको पार्थिव शरीरलाई घर ल्याइएको थियो ।

विपिनले सलमान खानको फिल्ममा पनि सङ्गीत दिएका थिए । यसै क्रममा सलमान र हिमेशको भेट भयो । त्यसपछि अभिनेताले आफ्नो फिल्म प्यार किया तो डरना क्यामा सङ्गीत दिने अवसर हिमेशलाई दिए ।