दक्षिण भारतीय अभिनेता थलपति विजय चुनावी मैदानमा उत्रिदैँ

 दक्षिण भारतीय फिल्म जगतका प्रसिद्ध अभिनेता थलपति विजय चुनावी मैदानमा उत्रिने भएका छन् । विजयको राजनीतिक दल सन् २०२६ मा हुन लागेको तमिलनाडुको विधानसभा चुनावमा आफ्नो भाग्यको परीक्षा दिन तयार देखिएको छ ।

निर्वाचन आयोगबाट पनि उनको पार्टीले स्वीकृति पाइसकेको छ । यो जानकारी थलपति विजय आफैँले दिएका हुन् । ती अभिनेताले आफ्नो अभिनय करियरलाई बिट मारेर राजनीतिमा प्रवेश गर्ने निर्णय गरेका छन् ।

उनले आफ्नो राजनीतिक दल पनि गठन गरेका थिए । अभिनेताले आफ्नो पार्टीको नाम तमिलगा वेत्री कझगम (टिभिके) राखेका छन् । भर्खरै मात्रै आफ्नो पार्टीको उनले आधिकारिक झण्डा र चुनाव चिन्ह सार्वजनिक गरेका थिए ।

भारतको निर्वाचन आयोगले आधिकारिक रूपमा तमिलगा वेत्री कझगमलाई राजनीतिक दलको रूपमा दर्ता गरेको विजयले भनेका छन् ।यससँगै निर्वाचन आयोगले उनको दललाई राजनीतिक दलका रूपमा चुनावी राजनीतिमा सहभागी हुन अनुमति दिएको पनि उनले बताएका छन् ।