जनयुद्धमा मारिएका ८३७१ जनाको नाम सहिदका रुपमा राजपत्रमा प्रकाशित

काठमाडौं । सरकारले जनयुद्धका क्रममा सहिद भएका ८३७१ जना सहिदहरूको नाम राजपत्रमा प्रकाशित गरेको छ । प्रधानमन्त्री पुष्पकमल दाहालले आफू तेस्रोपल्ट सरकारको नेतृत्व गरेलगत्तै सहिदको नाम राजपत्रमा प्रकाशित गर्ने बताएका थिए ।

अदालतले द्वन्द्वकालीन मुद्दामा चासो दिन थालेपछि यसलाई राजनीतिक रङ दिन प्रधानमन्त्री दाहालसँगै मा‌ओवादी धारका सबै घटकले प्रयास गरिरहेका छन् ।

विस्तृत शान्ति सम्झौता गरेर शान्ति प्रक्रियामा आएकाले आफूहरुमाथि फौजदारी अनुसन्धान हुन नसक्ने तर्क माओवादीहरुले गर्दै आएका छन् ।

तर मानव अधिकारवादी समुदायले भने गैरसैनिक र हतियारविहीन अवस्थामा रहेका नागरिकमाथिका ज्यादती जहिलेसुकै छानबिन र कारवाहीको विषय बन्ने भन्दै नियमित अदालतबाटै भए पनि दोषीउपर कारवाही गर्न दबाब दिँदै आएको छ ।