विदेशी मुद्रा सञ्चितिमा केही राहत, शोधनान्तर घाटा भने बढेको बढ्यै

काठमाडौँ । रेमिट्यान्स आप्रवाहमा सुधार हुँदा विदेशी मुद्राको सञ्चितिमा सरकारलाई केही राहत भएको छ । नेपाल राष्ट्र बैंकले सार्वजनिक गरेको ९ महिनाको आर्थिक स्थितिसम्बन्धी प्रतिवेदनअनुसार अघिल्लो महिनाभन्दा यो महिना ३ करोड अमेरिकी डलर सञ्चिति बढेको छ ।

चैत मसान्तसम्म कुल विदेशी विनिमय सञ्चिति ९ अर्ब ६१ करोड अमेरिकी डलर रहेको छ, जुन फागुन मसान्तसम्म ९ अर्ब ५८ करोड थियो ।रेमिट्यान्स आप्रवाह गत फागुन मसान्तसम्म ६ खर्ब ३१ अर्ब १९ करोड थियो । यो रकम चैत मसान्तमा आउँदा ७ खर्ब २४ अर्ब ७४ करोड पुगेको छ । अघिल्लो वर्षको सोही अवधिको तुलनामा भने यो केही कम हो ।

शोधनान्तर घाटा भने एक महिनामै १० अर्ब रूपैयाँले बढेको छ । राष्ट्र बैंकको तथ्याङ्क अनुसार चैत मसान्तसम्म शोधनान्तर घाटा २ खर्ब ६८ अर्ब रुपैयाँ छ । यो घाटा फागुन मसान्तसम्म २ करोड ५८ अर्ब थियो ।