नेपालको पहिलो राजनीतिक शक्ति हुने सम्भावना हुँदाहुँदै नेकपा एमालेका तत्कालीन अध्यक्ष केपी शर्मा ओलीले पुष्पकमल दाहाल प्रचण्डको राजनीति जोगाइदिन निकै उदारतापूर्वक पार्टीमा समाहित गरे । शेरबहादुर देउवासँग मिलेर गरेका हर्कतहरुका कारण जनतासामु जाँदा पनि नाक लुकाउनुपर्ने अवस्थामा पुगेका प्रचण्डलाई ओलीले शिरमा बोकेर हिँडे । चितवनमा एउटा छोरीलाई जिताउन मतपत्र चपाउनेदेखि निर्वाचन आयोग कब्जा गरेर पुन:मतदान गराउनेसम्मको अवस्थामा पुर्याए, जसले गर्दा कांग्रेस र देउवाको राजनीति समेत धूलीसात् भयो । छोरीको त्यो हविगत भएपछि आफ्नो थप बिचल्ली हुने अवस्थामा पुगेका प्रचण्डलाई ओलीले उद्धार गरेर करिब समान हैसियत दिएर चुनावमा नाक जोगाइदिए । अहिले तिनै ओलीविरुद्धका षड्यन्त्रमा प्रचण्ड उद्धत भएका छन् । यसले आफू पनि गुँड बनाउन नसक्ने, अरुले बनाएका गुँड पनि देखी नसहने प्रचण्ड चरित्र उदांगो भएको छ ।

सबैले विश्वास गर्न छाडेपछि

प्रचण्ड अहिले जनताको नजरमा मात्र होइन, कुनै पनि शक्तिले पत्याउन नसक्ने अवस्थामा पुगेका छन् । प्रचण्डबाट खाएको धोकाकै कारण रिसले देउवा प्रधानमन्त्री ओलीको समर्थनमा पुगेका छन् । आफ्नो अडान, निर्णय, आत्मबल र आत्मविश्वास नभएका उनी जसले जता घुमायो उतै घुम्ने अवस्थामा पुगेका छन् । वितगमा उनले राजनीतिक शक्ति हासिल गर्न अवाञ्छित तत्वको सहारा लिएका कारण पनि अहिले उनी बढी अस्थिर र विचलित मनोदशामा पुगेको देखिन्छ । यही कारण उनी बालुवाटारमा एउटा सहमति गर्छन्, लैनचौर, कोटेश्वर हुँदै खुमलटार पुग्दा अडान फेरिइसकेका हुन्छन् । ओली प्रधानमन्त्री भएलगत्तै प्रचण्ड आशिर्वाद थाप्न भारत हुँदै चीनको भ्रमण गरेका थिए । त्यस घटनाले न ओलीको विश्वास उनीप्रति रह्यो, न त भारत र चीनले नै उनलाई स्वीकार गर्यो । सबैतिरबाट अविश्वसनीय शक्तिका रुपमा चिनिएपछि प्रचण्डको राजनीति धरापमा पर्यो । त्यहीकारण अहिलेको बरबराहट देखिएको छ ।

सेरेमोनियल अध्यक्ष नै बढ्ता भो

प्रचण्डको ढिपीकै कारण पछिल्लो समय प्रधानमन्त्री केपी शर्मा ओलीले कार्यकारी अध्यक्ष बनाए । कार्यकारी भइसकेपछि सिंगो पार्टी सञ्चालनमा केन्द्रित हुनुपर्ने हो । कुनै गुट वा पूर्वसमूह नहेरी सबैको नेता बन्नुपर्ने हो । ओलीलाई विश्वासमा लिएर पार्टीलाई निश्चित कार्ययोजनाका साथ अघि बढाउनुपर्ने हो । तर उनी कार्यकारी होइन, ओलीका विरुद्ध षड्यन्त्रकारी बनेर निस्किए । आम कार्यकर्ताले उनलाई उही रुपमा बुझ्न थालेका छन् । यसले कार्यकारी त के ? यति ठूलो पार्टीको सेरेमोनियल अध्यक्ष दिनु पनि उनका लागि बढी भएको प्रमाणित हुन्छ ।

खराब कारोबारीको मोहजाल

प्रचण्ड बदनाम व्यापारी र खराब कारोबारीसँगको मोहजालमा नराम्ररी फसेका कारण पनि यतिखेर संकटमा परेका हुन् । अजेयराज सुमार्गीको नाममा देखिएको अवैध धनसँग उनको नाम जोडिन्छ । सडक ठेक्कादेखि मलकाण्डमा राज्य र जनतालाई ठूलो घात गरेका शारदाप्रसाद अधिकारीको घरमा प्रचण्डले आश्रय नै लिएर बसेका छन् । जब राज्यले ती खराब व्यापारी र कारोबारीमाथि कठोर व्यवहार देखाउँछ, प्रचण्ड बर्बराउन थाल्छन् ।

आफन्तवादको भद्दा प्रयोग

आफ्नो ज्यानको बाजी लगाएर जनयुद्धमा होमिएका नेता कार्यकर्तालाई धोका दिएर केही व्यापारी र आफ्नो पारिवारिक सञ्जाल पोस्न प्रचण्ड लागिपरेका छन् । छोरी मेयर, बुहारी मन्त्री, ज्वाइँ र भतिजाहरु एक से एक पदमा ढलिमलि गरिरहेका छन् । उनका यस्तै आग्रह ओलीले नमानेपछि राजीनामा माग्न सुर कस्छन् ।

आफ्नो काम नगर्ने, ओलीसँग दागा धर्ने

प्रधानमन्त्री ओलीले पाँच वर्ष ढुक्कले सरकार सञ्चालन गर्ने, प्रचण्डले पार्टी गतिविधिमा केन्द्रित हुने सहमति गरेको भोलिपल्टैदेखि प्रचण्ड सरकार परिवर्तनका खेल खेल्न पुग्छन् । यसका लागि अनावश्यक र असान्दर्भिक सर्त र अडान ओलीसामु प्रस्तुत गर्छन्, ताकि निहुँ खोज्न पाइयोस् । पार्टी समायोजनदेखि संगठनलाई पूर्णता दिने काम भने उनले केही गरेका छैनन् ।

जनमतको भ्रम

प्रचणडले ओलीसँग निहुँ खोज्दा आफ्नो पूर्वहैसियतको कहिल्यै ख्याल गरेको देखिएन । माओवादी विसर्जन भइसकेपछि एमालेले उनलाई दिएको ओतबारे पनि पछिल्लो निर्वाचनमा प्राप्त जनमतसँगै बिर्सेको देखिन्छ । पूर्वहिसयत ख्याल गरेको भए अहिले जेजति प्राप्त गरेका छन्, त्यो नै उनका लागि धेरै ठूलो प्राप्ति हो । तर जब उनले ओलीसँग आफूसँग दाज्न पुग्छन्, बालुवाटारको बाडुली लाग्न थाल्छ । पेरिसडाँडामा जमेको धुलो बिर्सन्छन् ।

प्रचण्डसँग अहिले उनकै पूर्वसमूहका कुनै पनि सदस्य छैनन् । अहिले ओलीमाथि आक्रमण गर्न माधव नेपाल, वामदेव गौतम र झलनाथ खनालले प्रयोग गरे पनि वास्तवमा यस समूहले प्रचण्डलाई नेता स्वीकार गर्न सक्ने छैन । अहिलेकै अवस्थामा ओलीको शासन ढाल्न सजिलो त छैन, केही गरी सफल भइहाले पनि त्यस ठाउँमा प्रचण्ड प्रतिस्थापित हुने छैनन् । माधव नेपालले प्रचण्डलाई नेता मान्नुपर्ने र उनका निम्ति पूर्वएमालेको संगठनप्रति धोका दिनुपर्ने कुनै कारण छैन । माधव नेपालहरुबाट धोका खाएपछि बरु फेरि ओलीकै शरणमा जानुपर्नेचाहिँ हुन सक्छ ।

प्रधान सम्पादक नारायण दाहाल
सम्पर्क 9851021550