पारिवारिक कथावस्तुमा निर्माण भएको चलचित्र ‘सानो संसार’को टिजर सार्वजनिक

 पारिवारिक कथावस्तुमा निर्माण भएको चलचित्र ‘सानो संसार’को टिजर सार्वजनिक भएको छ ।

आगामी असोज ११ गते प्रदर्शनमा आउने सिनेमाको शुक्रबार सार्वजनिक टिजरले गरिबी, लेटेस्ट ग्याजेटप्रति युवापुस्ताको मोह, अमेरिका सपना समेटिएको कथा प्रस्तुत गरेको छ ।

सिद्धार्थ पुडासैनीको निर्देशनमा बनेको सिनेमाको टिजरमा सहरमा बसोबास गर्ने एउटा मध्यम वर्गीय परिवारको संघर्ष आम्दानी नहुँदा उत्पन्न कलह र सन्तानको विदेश मोहलाई मर्मस्पर्शी रुपमा देखाएको छ ।पुडासैनीले यही सिनेमाबाट लेखन तथा निर्देशनमा डेव्यु गर्दैछन् । उनलाई सिनेमाको कथा लेखनमा सरिष्मा खत्रीले सघाएकी छन् ।

निर्माता अर्जुन कुमारको लगानीमा निर्माण भएको सिनेमामा हास्य कलाकार केदार घिमिरे ‘माग्नेबुढा’की श्रीमती सीतादेवी तिमल्सेनाको मुख्य भुमिका रहेको छ । सिनेमामा सीताका अलवा राज पंगेनी शर्मा, अनु दाहाल, अन्जसा रिजाल शिशिर सिवाकोटी, सरिता भण्डारी र जीवन गौतमको अभिनय रहेको छ । यी सवै कलाकारले नेपाली रजतपटमा डेव्यु गर्दैछन् ।

राजधानी मिडिया एड प्रोडक्सन र प्रिन्सेस मूभिजको व्यानरमा निर्माण भएको सिनेमाका निर्माता अर्जुन कसमार र कार्यकारी निर्माता माधव वाग्ले हुन् ।

प्रवीन खड्काको छायांकन र रोमी तन्डुकारको सम्पादन रहेको सिनेमालाई राजधानी मिडिया र प्रिन्सेस मूभिजले संयुक्तरुपमा प्रदर्शन गर्दैछन् ।