फिल्म ‘जेरी: अन टप’मा जोडिए कथा वाचक साईग्रेस

कथा वाचकको रूपमा चर्चित साईग्रेस पोखरेल फिल्म ‘जेरी: अन टप’मा जोडिएका छन् । फिल्मको कथा बलियो बनाउने उद्देश्यले निर्माण टिमले उनलाई फिल्ममा जोडेको हो ।

फिल्मका निर्माता सरोज न्यौपानेले साईग्रेसले अब फिल्मको कथालाई अझै मजबुत बनाउने बताए । उनले भने–‘उहाँले अब हाम्रो स्क्रिप्टलाई अझै परिमार्जित र मजबुत बनाउनुहुनेछ । उहाँलाई स्क्रिप्ट डाक्टर त भनिहाल्न मिल्दैन । तर, उहाँ जस्तो व्यक्तिले हाम्रो स्क्रिप्टमा आफ्नो क्रिएशन थप्दा अझै उत्कृष्ट हुनेछ भन्ने विश्वासमा छौँ ।’

सुयोग गुरुङको निर्देशनमा बन्न लागेको यो फिल्मको छायाङ्कन असोजबाट सुरु हुनेछ । फिल्मलाई काठमाडौँ, लुक्ला लगायतका स्थानमा खिचिनेछ ।

अनमोल केसी, आँचल शर्मा र जसिता गुरुङको मुख्य भूमिका रहने फिल्मलाई फागुनको २ गतेबाट रिलिज गर्ने घोषणा निर्माण पक्षले गरिसकेको छ ।